स्पेनका प्रधानमन्त्री पेड्रो साञ्चेजले देशमा चुलिँदो घरजग्गा (आवास) सङ्कट र बढ्दो जनविरोधका बीच आगामी नोभेम्बर २९ का लागि अचानक मध्यावधि आमनिर्वाचनको घोषणा गर्नुभएको छ। प्रधानमन्त्री साञ्चेजले म्याड्रिडस्थित आफ्नो आधिकारिक निवास ‘प्यालेस् अफ मोन्क्लोआ’बाट टेलिभिजनमार्फत राष्ट्रका नाममा सम्बोधन गर्दै देशको भविष्य कस्तो बनाउने भन्ने निर्णय जनताकै हातमा सुम्पिने समय आएको बताउनुभयो।
संसदमा आवास क्षेत्र सुधार सम्बन्धी दुई महत्वपूर्ण अध्यादेश (रोयल डिक्री) पारित हुन नसकेको ७२ घण्टा नबित्दै यो कदम चालिएको हो। बढ्दो घरभाडा र घरजग्गाको चर्को मूल्य नियन्त्रण गर्न सरकारले ल्याएका आपत्कालीन राहत उपायहरूलाई संसदले अस्वीकार गरेपछि साञ्चेज नेतृत्वको अल्पमतको गठबन्धन सरकार ठूलो दबाबमा परेको थियो।
देशभर आवास अधिकारकर्मी र सर्वसाधारणले प्रदर्शन तीव्र पारेका छन्। राजधानी म्याड्रिडको केन्द्रीय क्षेत्र ‘पुएर्ता डेल सोल’मा सयौँ प्रदर्शनकारीहरू पाल टाँगेर बसिरहेका छन् भने स्पेनका प्रमुख शहरहरूमा पनि विरोध प्रदर्शन फैलिएको छ।
प्रधानमन्त्री साञ्चेजले आफ्नो सरकारले केही गल्तीहरू गरेको र सोचेजति सबै काम पुरा गर्न नसकेको स्वीकार गर्नुभएको छ। यद्यपि, असमानता घटाउन र थप सामाजिक सुधारका नीतिहरू लागू गर्नका लागि जनताबाट नयाँ र स्पष्ट जनादेश आवश्यक रहेको उहाँको भनाइ छ।
