जेठ २३-नेपाल र भारतबीचको कूटनीतिक तथा राजनीतिक सम्बन्धलाई थप प्रगाढ बनाउने उद्देश्यका साथ नयाँ दिल्लीमा उच्च स्तरीय राजनीतिक भेटघाट सुरु भएको छ। भारतको औपचारिक भ्रमणमा रहेका नेपालका परराष्ट्रमन्त्री शिशिर खनाल र भारतीय जनता पार्टी (भाजपा) का विदेश विभाग प्रमुख डा. विजय चौथाइवालेबीच आज शनिबार नयाँ दिल्लीमा सौहार्दपूर्ण भेटवार्ता सम्पन्न भएको छ।
भेटका क्रममा दुई नेताहरूबीच नेपाल-भारतबीचको ऐतिहासिक र बहुआयामिक सम्बन्धलाई अझ सुदृढ पार्ने विषयमा गहन छलफल भएको छ। नयाँ दिल्लीस्थित नेपाली दूतावासका अनुसार, भेटवार्तामा सरकार-सरकारबीचको कूटनीतिक माध्यमका साथै राजनीतिक पार्टी-पार्टी र दुई देशका जनता-जनताबीचको (पिपुल्स-टु-पिपुल्स) सम्बन्धलाई कसरी अझ गाढा र प्रभावकारी बनाउन सकिन्छ भन्ने विषयमा मुख्य केन्द्रित रही कुराकानी भएको थियो।
परराष्ट्रमन्त्री खनाल आफ्ना भारतीय समकक्षी, विदेशमन्त्री एस. जयशङ्करको मैत्रीपूर्ण निमन्त्रणामा शुक्रबार नयाँ दिल्ली आइपुग्नुभएको हो। यो भ्रमणले नेपाल र भारतबीच रहेका विभिन्न द्विपक्षीय मामिला, पारस्परिक हितका विषय र आगामी सहकार्यका क्षेत्रहरूमाथि उच्च राजनीतिक तहमा संवाद गर्ने महत्त्वपूर्ण अवसर प्रदान गरेको छ। भ्रमणका क्रममा अन्य उच्च पदस्थ भारतीय अधिकारीहरूसँग पनि भेटघाट हुने कार्यक्रम रहेको छ।
