अमेरिकी सिनेटले राष्ट्रपति डोनल्ड ट्रम्पको इरानविरुद्ध सैन्य कारबाही गर्ने अधिकारलाई सीमित गर्ने प्रस्ताव पारित गरेको छ। यो कदमलाई ट्रम्पको सैन्य अधिकारमाथि कङ्ग्रेसको एक दुर्लभ र ठूलो झट्काका रूपमा हेरिएको छ। सिनेटमा भएको मतदानमा ५०-४८ मतले यो युद्ध अधिकार सम्बन्धी प्रस्ताव स्वीकृत भएको हो।
यस प्रस्तावको पक्षमा सतारुढ रिपब्लिकन पार्टीका चार जना सिनेटरहरू—सुजन कोलिन्स, र्यान्ड पल, लिसा मुर्कोव्स्की र बिल क्यासिडी—ले आफ्नो पार्टीको लाइनभन्दा बाहिर गएर ड्यामोक्र्याटहरूलाई साथ दिएका थिए। अर्कोतर्फ, ड्यामोक्र्याट सिनेटर जन फेटरम्यानले भने यसको विपक्षमा मतदान गरे। केही रिपब्लिकन सिनेटरहरूको अनुपस्थितिले पनि यो प्रस्ताव पारित हुन सहज बनाएको थियो।
यो प्रस्तावले अमेरिकी राष्ट्रपतिलाई कङ्ग्रेसको स्पष्ट अनुमति वा युद्धको घोषणा बिना इरानविरुद्ध सैन्य बल प्रयोग गर्न वा युद्ध जारी राख्न रोक लगाउँछ। यसअघि अमेरिकी तल्लो सदन ‘हाउस अफ रिप्रिजेन्टेटिभ्स’ ले पनि २१५-२०८ मतले यो प्रस्ताव पारित गरिसकेको छ। दुवै सदनबाट पारित भए पनि यो एक कन्करेन्ट रिजोल्युसन भएकाले यसमा राष्ट्रपतिको हस्ताक्षर आवश्यक पर्दैन र यसको कानुनी बाध्यता भने रहँदैन।
ह्वाइट हाउसले यस मतदानलाई केवल “साङ्केतिक” मात्र भएको भन्दै यसको महत्त्वलाई खारेज गरेको छ। राष्ट्रपति ट्रम्पले पनि सामाजिक सञ्जाल ट्रुथ सोसलमा आफ्नै पार्टीका विद्रोही सिनेटरहरूलाई निन्दा गर्दै यो कदमको आलोचना गरेका छन्। यद्यपि, अमेरिकी कङ्ग्रेसका सदस्यहरूले भने राष्ट्रपतिले एकलौटी रूपमा युद्धको निर्णय लिन नपाउने र कङ्ग्रेसको संवैधानिक अधिकार सुरक्षित हुनुपर्ने अडान राख्दै आएका छन्।
