नेपाली चलचित्र क्षेत्रका चर्चित एक्सन स्टार निखिल उप्रेती अभिनित बहुप्रतीक्षित चलचित्र ‘आचार्य‘ देशैभरका सिनेमाघरहरूमा प्रदर्शन भइरहेको छ। लामो समयपछि निखिललाई आफ्नै एक्सन अवतारमा पर्दामा देख्न पाउँदा दर्शकहरूमाझ ठूलो उत्साह देखिएको छ। चलचित्र सुरु हुनुअघि नै निर्माण भएको जबरदस्त ‘हाइप’का कारण मुख्य सहरका प्रमुख मल्टिप्लेक्स तथा सिङ्गल स्क्रिनहरूमा दर्शकको बाक्लो उपस्थिति रहेको छ।
चलचित्रले अग्रिम टिकट बुकिङ खुला भएसँगै बक्स अफिसमा सुखद र आक्रामक सुरुवातको संकेत दिएको थियो। पहिलो दिनदेखि नै काठमाडौँ उपत्यकाका साथै पोखरा, नारायणगढ, बुटवल र पूर्वका प्रमुख हलहरूमा सोहरू उच्च अकुपेन्सीमा चलेका छन्। विशेष गरी एक्सन फिल्म पारखी युवा र निखिलका पुराना प्रशंसकहरूको उच्च आगमनले सिनेमाघरहरूमा रौनक थपेको छ भने यसले सुरुवाती दिनमै बलियो व्यापारिक सङ्कलन गर्ने निश्चित देखिएको छ।
हलबाट बाहिरिएका दर्शकहरूले चलचित्रको कथावस्तु, एक्सन दृश्यहरू र निखिल उप्रेतीको अभिनयलाई मन पराएका छन्। विशेषगरी चलचित्रको द्वन्द्व निर्देशन र प्राविधिक पक्षलाई दर्शकले रुचाएका छन्। दर्शकबाट प्राप्त सकारात्मक प्रतिक्रियाका कारण आगामी साता र सातान्तमा पनि चलचित्रको व्यापार अझै उकासिने र बक्स अफिसमा लामो दौड कायम राख्ने निर्माण पक्ष तथा चलचित्र विश्लेषकहरूको अनुमान छ।
