अमेरिकी सेनाले इरानका सैन्य ठेगानाहरूमा शक्तिशाली हवाई आक्रमण गरेको छ। ओमानको खाडी नजिकै रहेको रणनीतिक बन्दरगाह Strait of Hormuz मा एक व्यापारिक मालवाहक जहाजमाथि ड्रोन आक्रमण भएपछि राष्ट्रपति डोनाल्ड ट्रम्पले इरानले युद्धविरामको “मूर्खतापूर्ण उल्लंघन” गरेको आरोप लगाउँदै यो कदम चालेका हुन्।
अमेरिकी सेन्ट्रल कमान्डका अनुसार शुक्रबार गरिएका यी स्ट्राइकहरूमा इरानका मिसाइल तथा ड्रोन भण्डारण केन्द्रहरू र तटीय राडार स्थानहरूलाई निशाना बनाइएको छ। बिहीबार सिंगापुरको झण्डा रहेको ‘एभर लभली’ नामक कार्गो जहाजमाथि भएको ड्रोन आक्रमणको प्रतिक्रियास्वरूप यो कारबाही गरिएको अमेरिकाले जनाएको छ।
इरानले भने उक्त व्यापारिक जहाजले अनुमति नदिएको अनाधिकृत मार्ग प्रयोग गरेर खाडी जलमार्ग पार गर्न खोजेकाले आक्रमण गरिएको दाबी गरेको छ। इरानको इस्लामिक रिभोलुसनरी गार्ड कर्प्सले अमेरिकी प्रशासनलाई “सन्धि तोड्ने सरकार” को संज्ञा दिँदै अमेरिकाले विभिन्न बहानामा आफ्नो तटीय क्षेत्रमा आक्रमण गरेको आरोप लगाएको छ र फेरि आक्रमण भए अझ कडा जवाफ दिने चेतावनी दिएको छ।
यो घटना हुनुभन्दा केही दिनअघि मात्रै (जुन १७ मा) अमेरिका र इरानबीच तनाव कम गर्न १४-बुँदे प्रारम्भिक सम्झौता भएको थियो, जसमा इरानले ६० दिनसम्म व्यापारिक जहाजहरूलाई सुरक्षित र निःशुल्क मार्ग दिने सहमति जनाएको थियो। तर यो नयाँ द्वन्द्वले उक्त युद्धविराम र शान्ति वार्ता संकटमा परेको छ।
