काठमाडौं — जनता समाजवादी पार्टी (जसपा) नेपालका अध्यक्ष उपेन्द्र यादवले वर्तमान सरकारको पहिलो १०० दिनलाई सुशासन र संस्थागत सुधारतर्फको एउटा सकारात्मक प्रारम्भिक प्रयासको रूपमा अर्थ्याएका छन्। सरकारको सय दिने कार्यसम्पादनबारे सामाजिक सञ्जालमार्फत आफ्नो टिप्पणी सार्वजनिक गर्दै उनले यस्तो धारणा राखेका हुन्।
अध्यक्ष यादवले सरकारको प्रारम्भिक कार्यकाल ठूला लोककल्याणकारी कार्यक्रमहरू घोषणा गर्नुभन्दा पनि शासन प्रणालीमा सुधार, भ्रष्टाचार नियन्त्रण, प्रशासनिक पुनर्संरचना तथा राज्य संयन्त्रलाई प्रभावकारी बनाउने प्रयासमा केन्द्रित देखिएको उल्लेख गरे। संस्थागत परिवर्तनलाई प्राथमिकतामा राखेर अघि बढ्नुलाई उनले सकारात्मक संकेतका रूपमा लिएका छन्।
यद्यपि, पूर्वउपप्रधानमन्त्री समेत रहेका यादवले अहिले नै सरकार पूर्ण रूपमा सफल वा असफल भएको निष्कर्ष निकाल्नु हतारो हुने स्पष्ट पारेका छन्। सरकारले अघि सारेका नीति तथा निर्णयहरू कत्तिको प्रभावकारी रूपमा कार्यान्वयन हुन्छन् र त्यसले नागरिकको दैनिक जीवनस्तरमा कस्तो परिवर्तन ल्याउँछ भन्ने आधारमा मात्रै सरकारको दीर्घकालीन मूल्यांकन हुने उनको भनाइ छ।
देश अझै पनि केही हदसम्म राजनीतिक संक्रमण र निराशाबाट गुज्रिरहेको उल्लेख गर्दै अध्यक्ष यादवले शिक्षा, स्वास्थ्य, रोजगारी र आर्थिक व्यवस्थापनका क्षेत्रमा रहेका गम्भीर चुनौतीहरूलाई हल गर्न सरकार थप जिम्मेवार बन्नुपर्नेमा जोड दिए। उनले मधेसी, आदिवासी जनजाति, दलित र पिछडिएका समुदायको सम्मानजनक सहभागिता र अधिकार सुनिश्चित गरेर मात्रै लोकतन्त्रलाई थप समृद्ध बनाउन सकिने स्मरण गराए।
