काठमाडौं, ३ जेठ (२०८३) । नेपाल कम्युनिस्ट पार्टी (एमाले) ले आफ्ना तत्कालीन महासचिव मदन भण्डारी र संगठन विभाग प्रमुख जीवराज आश्रितको स्मृतिमा आज काठमाडौंको मदननगर, बल्खुमा विशेष स्मृति सभा आयोजना गरेको छ। मदन–आश्रितको ३३औं स्मृति दिवसको अवसर पारेर एमाले केन्द्रीय कार्यालयद्वारा आयोजित उक्त कार्यक्रममा पूर्वराष्ट्रपति एवं नेकपा एमालेकी पूर्वउपाध्यक्ष विद्यादेवी भण्डारी प्रमुख अतिथिको रूपमा सहभागी हुनुभएको थियो।
कार्यक्रमका प्रमुख अतिथि, पार्टीका नेता, कार्यकर्ता तथा सर्वसाधारणहरूले स्वर्गीय मदन भण्डारी र जीवराज आश्रितको तस्बिरमा माल्यार्पण गर्दै भावपूर्ण श्रद्धाञ्जली अर्पण गरेका थिए। स्मृति सभामा उपस्थित नेताहरूले नेपाली कम्युनिस्ट आन्दोलन र ‘जनताको बहुदलीय जनवाद’ (जबज) को विकासमा मदन भण्डारीले पुर्याउनुभएको अतुलनीय योगदान र जीवराज आश्रितको संगठनात्मक सुझबुझको चर्चा गरेका थिए।
वि.सं. २०५० साल जेठ ३ गते चितवनको दासढुंगामा भएको रहस्यमय जिप दुर्घटनामा परी एमालेका तत्कालीन प्रभावशाली नेताद्वय मदन भण्डारी र जीवराज आश्रितको निधन भएको थियो। सोही दिनको सम्झनामा एमालेले हरेक वर्ष जेठ ३ गते देशव्यापी रूपमा विभिन्न कार्यक्रम गरी मदन–आश्रित स्मृति दिवस मनाउँदै आएको छ।
