अमेरिका, क्यानडा र मेक्सिकोको संयुक्त आयोजनामा भइरहेको फिफा वर्ल्ड कप २०२६ बाट एउटा निकै अचम्मको घटना सार्वजनिक भएको छ। प्रतियोगितामा आफ्नो पहिलो खेल खेल्नुअघि नै इङ्गल्याण्ड फुटबल टोलीको क्याम्पमा सुरक्षाको ठुलो लापरबाही देखिएको हो। फ्लोरिडाको प्रि-टूर्नामेंट बेसबाट मिजुरीको क्यानसास सिटीस्थित ट्रेनिङ क्याम्प ‘स्वोप सकर भिलेजमा सर्ने क्रममा इङ्गल्याण्ड टोलीका सामानहरू ओसारपसार गरिरहेको गाडीबाट बहुमूल्य सामग्रीहरू चोरी भएका छन्। यस हाई-प्रोहफाइल चोरीको घटनापछि प्रतियोगिताको सुरक्षा व्यवस्थालाई लिएर सर्वत्र खैलाबैला मच्चिएको छ।
समाचार विवरणहरूका अनुसार, चोरी भएका सामानहरूमा इङ्गल्याण्ड टोलीका मुख्य स्टार खेलाडीहरू—ह्यारी केन र जुड बेलिङ्घमका कस्टमाइज्ड म्याच बुट्स (खेल्ने जुत्ता) रहेका छन्। यसका साथै, अभ्यासका लागि प्रयोग गरिने फिफाका आधिकारिक फुटबलहरू, कोचिङ स्टाफका महत्त्वपूर्ण उपकरणहरू, मसाज टेबल र रणनीतिक बोर्डहरू समेत गायब पारिएका छन्। सामान बोकेको सवारी साधन क्यानसास सिटी पुग्दा अधिकांश सामानहरू गायब भइसकेका थिए र सिङ्गो टोलीका लागि एउटा मात्र फुटबल बाँकी रहेको पाइएको थियो। प्रतियोगिताको सुरुवातमा नै घटेको यस अप्रत्याशित घटनाले इङ्गल्याण्डको टोली र फुटबल जगतलाई नै ठुलो झट्का दिएको छ।
यस घटनाको लगत्तै स्थानीय क्यानसास सिटी प्रहरी विभागले तीव्रताका साथ अनुसन्धान सुरु गरेको छ। प्रहरीले चोरीको आशङ्कामा कारबाही अघि बढाउँदै दुई जना संदिग्ध व्यक्तिहरूलाई हिरासतमा लिएर सोधपुछ गरिरहेको जनाएको छ। सुरक्षा निकायहरूले सामानलाई एक राज्यबाट अर्को राज्यमा लैजाने जिम्मेवारी पाएका लजिस्टिक ठेकेदार वा कुनै भित्री व्यक्तिकै मिलेमतोमा यो चोरी भएको हुन सक्ने आशङ्का गरेका छन्। हाल फुटबल एसोसिएसनले स्थानीय प्रहरीसँग मिलेर चोरी भएका सामानहरू जतिसक्दो चाँडो बरामद गर्न कडा प्रयास गरिरहेको छ।
विश्वकै सबैभन्दा ठुलो खेल उत्सव मानिने फिफा वर्ल्ड कपका क्रममा खेलाडी र उनीहरूको टोलीको सामान समेत सुरक्षित राख्न नसकेको भन्दै आयोजक राष्ट्र अमेरिकाको व्यवस्थापनमाथि गम्भीर प्रश्नहरू खडा भएका छन्। खेल प्रेमी तथा विश्लेषकहरूले अरबौँ डलर खर्च गरेर आयोजना गरिएको यस प्रतियोगितामा भीभीआईपी सुरक्षाको दाबी गरिए पनि अन्तर्राष्ट्रिय टोलीको गाडीबाटै जुत्ता र फुटबल जस्ता आधारभूत सामग्री चोरी हुनु अत्यन्तै लाजमर्दो विषय भएको टिप्पणी गरेका छन्। यो घटनाले तीन देशका १६ विभिन्न सहरहरूबीच टोलीहरूको सुरक्षित आवतजावत र अमेरिकी लजिस्टिक सुरक्षा व्यवस्थाको कमजोरीलाई छताछुल्ल पारेको छ।
इङ्गल्याण्डको टोलीले प्रतियोगिताको आफ्नो पहिलो समूह चरणको खेलमा बुधबार क्रोएसियाको सामना गर्दैछ। मुख्य प्रशिक्षक थोमस टुचेलको मार्गदर्शनमा टोली यस खेलका लागि कडा अभ्यासमा जुटिरहेका बेला, खेलको केही दिनअघि मात्र भएको यस घटनाले सहयोगी स्टाफ र खेलाडीहरूको ध्यान केही हदसम्म भड्काएको छ। यद्यपि, इङ्गल्याण्ड फुटबल एसोसिएसनले यस चोरीबाट टोलीको मनोबलमा कुनै असर नपर्ने र वैकल्पिक बुट्स तथा आवश्यक गियरहरूको व्यवस्था गरेर आफ्नो तयारीलाई पूर्वनिर्धारित तालिका अनुसार नै निरन्तरता दिने प्रस्ट पारेको छ।
