नयाँ दिल्लीस्थित भारत मण्डपममा १८ औँ ब्रिक्स शिखर सम्मेलन आयोजना भइरहेको छ। सेप्टेम्बर १२ र १३ मा हुने यस दुई दिने सम्मेलनको अध्यक्षता भारतीय प्रधानमन्त्री नरेन्द्र मोदीले गरिरहेका छन्। सम्मेलनमा सदस्य राष्ट्रका प्रमुखहरूका साथै विभिन्न साझेदार तथा आमन्त्रित देशका नेताहरू र अन्तर्राष्ट्रिय संस्थाका प्रतिनिधिहरूको सहभागिता रहेको छ।
सम्मेलनमा भाग लिन रुसी राष्ट्रपति भ्लादिमिर पुटिन, चिनियाँ राष्ट्रपति सि जिनपिङ, इरानी राष्ट्रपति मसुद पेजेस्कियान, र दक्षिण अफ्रिकी राष्ट्रपति सिरिल रामाफोसा लगायतका नेताहरू नयाँ दिल्ली पुग्ने क्रम जारी छ। सम्मेलनको क्रममा प्रधानमन्त्री मोदी र रुसी राष्ट्रपति पुटिन तथा चिनियाँ राष्ट्रपति सि जिनपिङबीच महत्वपूर्ण द्विपक्षीय भेटवार्ता र सीमा तथा व्यापारिक विषयमा छलफल हुने तय भएको छ।
यस पटकको सम्मेलनमा समावेशी विश्वव्यापी सुशासन, बहुपक्षीयताको सुदृढीकरण, खाद्य तथा ऊर्जा सुरक्षा, र सीमापार भुक्तानी प्रणाली प्रवर्धन जस्ता विषयहरू प्रमुख एजेन्डामा रहेका छन्। साथै, जलवायु परिवर्तन, नवीकरणीय ऊर्जा, प्रविधि र नवप्रवर्तनका क्षेत्रमा ब्रिक्स राष्ट्रहरूबिच सहकार्य बढाउने र ‘ग्लोबल साउथ’ (विकासोन्मुख राष्ट्रहरू) का प्राथमिकताहरूलाई विश्वमञ्चमा उठाउने विषयमा केन्द्रित रहेर छलफल भइरहेको छ।
अन्तर्राष्ट्रिय प्रतिनिधिहरूको सुरक्षालाई ध्यानमा राख्दै नयाँ दिल्लीमा करिब १५,००० प्रहरी तथा २०० भन्दा बढी अर्धसैनिक टोली परिचालन गरी उच्च सुरक्षा सतर्कता अपनाइएको छ। सम्मेलन अवधिभर संवेदनशील क्षेत्र र विशिष्ट मार्गहरूमा सर्वसाधारणका लागि ट्राफिक व्यवस्थापन तथा डाइभर्सन लागू गरिएको छ।
