चीनले रसुवागढी जोड्ने केरुङ नाका जाने स्थलमार्ग भदौ १७ गते (बुधबार) बिहान १० बजेदेखि पूर्ण रूपमा पुनः सञ्चालनमा ल्याएको छ। अविरल वर्षा र पानीका कारण अवरुद्ध बन्न पुगेको उक्त सडकको अन्तिम खण्डलाई चिनियाँ पक्षले अस्थायी रूपमा मर्मत तथा सफाइ गरी यातायातका लागि खुला गरेको हो।
सडक मार्ग पुनः सञ्चालनमा आएसँगै अब उद्धारकर्मी, आपतकालीन राहत सामग्री, औषधि तथा उद्धार कार्यका लागि अत्यावश्यक पर्ने भारी मेसिनरी र उपकरणहरू सडकमार्फत नै विपद् प्रभावित मुख्य क्षेत्रसम्म पुग्न सक्ने भएका छन्। यसअघि सडक अवरुद्ध हुँदा प्रभावित क्षेत्रमा ठूला उपकरण लैजान नसकिएकाले खोजी तथा उद्धारमा चुनौती थपिएको थियो। सडक सञ्जाल पुनः जोडिएपछि अब उद्धार कार्यलाई अझ तीव्र, व्यापक र प्रभावकारी बनाउन ठूलो सहयोग पुग्ने विश्वास लिइएको छ।
हाल सडक खुलाउने काम विपद्को मुख्य प्रभावित क्षेत्रसम्म पुगिसकेको छ। केरुङ नाका नजिकै रहेको चिनियाँ भवन वरपरको राष्ट्रिय राजमार्ग सफा गर्ने काम अन्तिम चरणमा पुगेको छ। प्रभावित क्षेत्रमा छुट्टाछुट्टै विधि र टोलीहरूको समन्वयमार्फत एकीकृत रूपमा खोज तथा उद्धार कार्य निरन्तर जारी राखिएको छ।
चिनियाँ सञ्चारमाध्यम सीसीटिभीका अनुसार सडक मार्ग खुलेसँगै पहिरो र बाढीका कारण अलपत्र परेका स्थानहरूमा सफाइ तथा पुनर्निर्माणका प्रारम्भिक कामहरू पनि सुरु भएका छन्। भारी मेसिनरीको सहज पहुँचले गर्दा प्रभावित क्षेत्रमा पुरिएका वा क्षति पुगेका संरचना हटाउन र आपत्कालीन सहायता उपलब्ध गराउन सहज भएको छ।
नाका जोड्ने मुख्य सडक सञ्चालनमा आएपछि सीमावर्ती क्षेत्रका सर्वसाधारण तथा स्थानीय प्रशासनलाई पनि राहत पुगेको छ। विपद् प्रभावित क्षेत्रमा आवश्यक राहत सामग्री पुर्याउन र उद्धार टोलीको आवतजावतलाई व्यवस्थित बनाउन सडक खुल्नु महत्त्वपूर्ण कोसेढुङ्गा सावित भएको छ।
